Eko Saputra: PAPARI Hidop di Negeri Banyak Bersabar

Oleh: Eko Saputra Poceratu

Par yang hari ini makang papari

beta mau datang kasi kanari

batamang dudu di sabalah ale pung kadera

mau uru sadiki ale pung sengsara

par yang hari karja karas di pelabuhan

yang bapikol sampe tulang rasa mo patah

par yang hari ini karja di kabong-kabong

yang stengah mati mar seng mau minta tolong

beta hormat kamong

par yang hari ini bajual dalang panas

bataria sampe mau putus napas

di lorong-lorong pasar

di muka-muka jalan,

di samping-samping swalayan

yang bajalang gendong ana sambil keku jualang

yang dudu gepe poro tagal seng pung kepeng par makang

beta sayang kamorang

par yang hari ini karja bangunan

tagal ana bini pung harapan

par yang hari ini jual Koran

par bali mama pung baras, par yang bajalang kilo-kilo jual gorengan, keku di kapala, par yang dapa hina iko jalang, par yang rela seng makang demi ana pung uang seragam,

par yang hari ini toma omba deng angin di lautang demi bayar ana uang kuliah, par yang tola garobak siang malam demi biaya barobat, par yang hari ini trap beca picah karingat dalang kota, demi ana pung uang skolah, par yang ojek dari malam sampe pagi par bini pung uang bersalin, kamong terbaik

par yang ada dudu manangis di dalam rumah, tagal pasangan hidop su kastinggal, par yang ada rindu maitua, mar maitua su deng orang, par yang usaha damai deng laki, mar laki su lari deng orang bini, par yang ada berjuang di ruang-ruang sidang demi pertahankan keluarga yang dong sayang, we beta mau bilang, kamong hebat

par yang hari ini ada stengah mati lawang sunyi, yang balom bisa angka kapala, tagal masa lalu yang paleng barat, par yang ada sambunyi dari kenyataan karena dapa iko dari rasa penyesalan, yang biking salah mar balom sempat minta maaf par orang dong sayang, beta mau bilang, kamong bisa

par yang hari ini karja karas di pabrik-pabrik, yang jatuh sakit, bahkan yang mati, demi mau kastunju kalo kamong adalah manusia berguna par keluarga, par yang hari ini merantau di orang pung tanah, tagal dapa bilang bodoh, tar skolah, tar bisa jadi manusia, yang nai di kapal, polo tas, polo rindu, yang pung ambisi basar harus angka orang tatau pung kapala di negeri, beta mau bilang, kamong pasti berhasil

par perempuan-perempuan janda yang hari ini ika aer mata di jantong, yang seng cengeng cari kepeng ponoh kantong, yang hari ini seng manja, seng taku hadapi dunia pung jahat, par laki-laki duda yang hari banting tulang par kashidop ana ana, yang rela ilang gagah, ilang nama, ilang malu, demi toga yang sarong ana ana pung bahu, kamong talalu

par yang sagala hari bautang di koperasi, yang seng bisa tidor siang, malam deng pagi tagal pikirang mo lunasi, karna musti tanggong keluarga pung stengah mati, par yang su bantu orang dalam kurang, mar tetap dapa kasmaso dalam jurang, dapa tipu deng uang, dapa kasjadi kambing hitam, beta mau bilang, kamong malaikat

par yang hari ini hamil di luar nikah, putus asa mar bisa bangkit, brani hadapi mulu piso, bisa damai deng kenyataan, par yang hari ini keguguran, kehilangan ana yang dong sayang, mar bisa merelakan, brani lia beso lusa, yang mampu rubah ingatan pahit deng satu kenangan manis, kamong adalah pejuang perasaan

par yang hari ini maso penjara tagal lindungi hutan, jaga tanah, tagal politik pung perbuatan, tagal hukum pung nubuatan, par yang hari ini ilang nyawa tagal bela adat pung jiwa, par yang dapa bunuh di jalang-jalang tagal bela rakyat pung keadilan, par yang ditinggalkan dari laki, bini, ana, keluarga, tagal berani lawan kepentingan, kamong paleng kuat

par yang hari ini seng bisa skolah tinggi, sistem seng kasi posisi, par yang hari ini buka panutup meja cuma ada kasbi dua biji, yang bangun amper siang manyapu jalang-jalang di kota, par yang hidop dari angka sampah, yang hari ini su karja karas mar orang laeng yang makang gaji, par yang hari ini bisa maafkan sodara sandiri, yang mau bantu orang pung susah biar sadiki, kamong adalah hati yang murni, kamong adalah manusia, yang manusiawi

Ambon, 22 Januari 2020

Dibacakan pada Festival Sastra Banggai Narasi ke-7 2023